Ályktun Stúdentaráðs Háskóla Íslands um skýrslu Ríkisendurskoðunar

• Stúdentaráð Háskóla Íslands fagnar hversu vel Háskóli Íslands kemur út úr
skýrslunni – kemur ekki á óvart.
• Samkeppnisstaða skólanna er skökk, enda fá einkareknu háskólarnir jafnmikið
fé og þeir opinberu frá ríkinu – einsdæmi.
• Jafnréttti til náms verði ekki skert með hertari inntökuskilyrðum eða
inntökuprófum.
• Ríkisstjórnin taki skýra afstöðu gegn upptöku skólagjalda í opinberum
háskólum og styðji við bakið á HÍ svo hann komist í hóp bestu háskóla í
heimi.
Skýrsla Ríkisendurskoðunar, Kostnaður, skilvirkni og gæði háskólakennslu, staðfestir
ýmislegt sem Stúdentaráð Háskóla Íslands hefur bent á síðustu ár.
Í skýrslunni kemur það sama fram og hefur margoft verið staðfest að Háskóli Íslands
er góður og vel rekinn skóli. Svo skýr samanburður á háskólum landsins hefur hins
vegar aldrei litið dagsins ljós og er skýrslan því afar athyglisverð á margan hátt.
Háskóli Íslands kemur áberandi best út í úttektinni.
Í skýrslunni er bent á að fyrirkomulag háskólastigsins hér á landi eigi sér ekki
hliðstæðu í nágrannalöndunum en Stúdentaráð hefur ítrekað bent á þá staðreynd. Hér
fá allir skólar ríkisframlag og skólagjöldin sem einkareknu háskólarnir innheimta
skerða ekki framlagið en það skekkir samkeppnisstöðu skólanna verulega. Einnig
kemur fram sú athyglisverða staðreynd að tekjur Háskólans í Reykjavík koma að
stærri hluta frá ríkinu heldur en tekjur Háskóla Íslands, eða 76% á móti 66% árið
2005, þrátt fyrir að skólagjöld í grunnámi hafi það ár verið 220 þúsund í HR.
Skýrsla Ríkisendurskoðunar bendir á ýmsar leiðir til þess að efla enn frekar
háskólamenntun í landinu og ein þeirra er að herða inntökuskilyrði við ríkisháskólana
til þess að draga úr brottfalli og auka skilvirkni. Stúdentaráð Háskóla Íslands ítrekar
hversu mikilvægt það er að allir eigi kost á háskólamenntun og vill frekar að spornað
verði við brottfalli með aðgerðum sem skerða ekki jafnrétti til náms.
Í öllum þeim greinum sem bornar voru saman, þ.e. lögfræði, viðskiptafræði og
tölvunarfræði kemur Háskóli Íslands best út. Viðamestur er samanburðurinn á
viðskiptafræði og eflaust marktækastur þar sem allir samanburðaskólarnir hafa kennt
viðskiptafræði um nokkurt skeið. Viðskiptadeild HÍ kemur best út úr samanburðinum
í öllum þáttum nema einum. Kannaður var kostnaður, akademísk staða, skilvirkni,
viðhorf nemenda og afdrif brautskráðra stúdenta. Viðhorf nemenda var áberandi verst
í HÍ, en þar var m.a. spurt um þætti eins og viðhorf til gæða kennslu, aðbúnaðar o.fl.
Þetta eru skýr skilaboð um að bæta þurfi aðbúnað stúdenta við HÍ. Þó má benda á að
útskrifaðir nemendur frá HÍ eru með hæstu launin og þeim vegnar best í starfi að námi
loknu.
Í skýrslunni kemur einnig fram að útskrifaðir karlmenn eru með töluvert hærri laun en
konur, og verður sá launamunur að hluta til ekki útskýrður. Stúdentaráð Háskóla
Íslands hefur ítrekað bent á að leiðrétta beri kynbundinn launamun í landinu sem fyrst
og hvetur enn til þess.

Athugasemdir

[Pétur Henry Petersen, 14.6.2007 kl. 14:02]

Ég skil nú reyndar aldrei afhverju inntökuskilyrði og próf teljast skerðing á jafnrétti til náms. Svona er þetta á Norðurlöndunum þar sem jafnrétti er mun stærri stærð í þjóðfélaginu en hér. Fjöldi nema á að fara eftir

a) tækifæri viðkomandi skóla til að mennta fólk

b) fjölda nema sem að geta numið slíkt nám  (fólk er misklárt, ég hef engann rétt á því að verða BS í kjarneðlisfræði nifteinda) - til þess er eðlilegt að hafa einhver inntökuskilyrði eða próf

c) Þjóðhagslegum rökum (en í hófi), t.d. ætti að auðvelda fólki að fara í hjúkrun og kennslu. Besta leiðin er þó að hækka laun starfstéttana hugsa ég. Hvort að eigi að hindra fólk í að fara í nám sem það getur valið og húsnæði er fyrir, en enga vinnu að fá, er góð spurning ósvarað hér, en nemendur eiga allaveganna að hafa aðgang að uppýsingum um hverjar séu líkur þess að námið nýtist þeim. 

[Pétur Henry Petersen, 14.6.2007 kl. 14:03]

valið átti að vera valdið