EFLING HÁSKÓLA OG VÍSINDARANNSÓKNA

Öflugir háskólar og vísindarannsóknir eru grundvöllur efnahagsframfara og  ein helsta uppspretta nýrra atvinnutækifæra. Ávinning vísindarannsókna má meðal annars sjá í lífsgæðabótum sem hljótast af framförum í læknavísindum, stuðning við stefnumótun í félagsmálum, tækninýjungar sem gera lífið léttara, og dýpri skilning á þeim vistkerfum sem ýmsar atvinnugreinar byggjast á.

 

Til að koma háskólum á Íslandi í fremstu röð þarf að að stórefla vísindarannsóknir. Hingað þarf að laða fleiri framúrskarandi vísindamenn, bæði íslenska og erlenda. Til þess að það takist þarf að búa þeim umhverfi sem er til þess fallið að þeir blómstri í starfi sínu.  Þegar það hefur tekist munu byggjast upp stórir öflugir rannsóknarhópar á þeim sviðum þar sem völ er á góðu fólki.

 

Þetta gerist ekki sjálfkrafa með því að fé sé veitt til háskóla og stofnana, heldur er áhrifaríkara að því sé veitt til vísindamanna í formi beinna vísindastyrkja.  Þannig skapast beinn ávinningur en ekki byrði fyrir skóla og stofnanir að ráða til sín góða vísindamenn. Á Íslandi í dag fer innan við ein af hverjum tíu krónum til vísindastarfs í gegnum slíka vísindasjóði.

 

Nánast allar vísindarannsóknir eru stundaðar í alþjóðlegu samfélagi, og við það verðum við alltaf að miða, því annars er útilokað að hér byggist upp framúrskarandi rannsóknir.  Þetta ætti að vera leiðarljós í öllu mati á rannsóknum og úthlutun fjár til þeirra.

 

Til þess að koma háskólum á Íslandi í fremstu röð leggjum við til að

 

• fjárframlög til vísindarannsókna verði stóraukin,

 

• allt nýtt fjármagn fari í samkeppnissjóði,

 

• styrkveitingar grundvallist eingöngu á mati á gæðum vísindamanna og verkefna þeirra,

 

• matið verði alltaf byggt á alþjóðlegum viðmiðum viðkomandi fræðasviðs,

 

• styrkjakerfið sé þannig útfært að það sé beinn fjárhagslegur hvati fyrir háskóla og stofnanir að ráða til sín bestu vísindamennina og búa í haginn fyrir þá.